Agaasimaha guud iyo agaasimayaasha waaxyaha waa mashiinka dhaqaajiya howsha wasaaradaha sidaa darteed qofka howshaas loo Xil saarayo waa in uu noqdaa mid AQOON, WAAYO ARAGNIMO, KARTI, DULQAAD iyo DAACADNIMO isku darsaday.

Waxaa nasiib daro weyn noqotay in agaasimayaasha guud iyo agaasimayaal waaxeedyo aan ehel u aheyn howsha wasaaradaha kuna caan baxay Musuq maasuq, Jaahilnimo iyo qabyaalad mudo dheer afduub ku heystaan howlaha kala duwan ee wasaaradaha taas oo horseeday dib u dhac iyo bur but ku dul habsaday wasaaradihii dalka.

Agaasimayaasha guud qaarkood oo xilka soo hayay tan iyo dowladii Cabdulaahi Yuusuf ayaa awood u yeeshay in ay hagaannwasiir kasta oo cusub oo lagu soo qoro wasaarado, sidoo kale amaanka wasaarada waxa ay gacanta I galiyeen maleeshiyo beeleedyo iyaga ka amar qaata taas oo wasaarada ka dhigtay meel iyaga u xureysan, waxaana la yaab leh in Hal qof isku heysto labada jago ee kala ah agaasimaha guud iyo xoghayaha joogtada ah ee wasaarada iyadoo aqoon yahano badan ay shaqo la’aan darbiyada la fadhiyaan.

Talaabada bilowga ah ee uu qaaday wasiirka warfaafinta Eng. Yariisow ee uu ku xaaqay agaasimihii guud iyo qaar ka mid ah agaasime waaxeedyada waa mid geesimo ku dhisan oo wasaarada warfaafinta u horseedeysa in ay howsheeda dib u habeen iyo labo kacleyn lagu sameeyo.

Eng. Yariisow waxaa la gudboon in uu ruug cadaayada saxaafada ee banaanka laga joojiyay howsha iyo talada wasaarada uu soo dhaweysto taladana la wadaago hadiise uu kuraasta kusoo fariisiyo rag la mid ah kuwa uu xilka ka qaaday xaaladiisu waxa ay noqoneysaa JUG JUG MEESHAADA JOOG.

Dhamaan wasiirada cusub waxaa la gudboon in ku daydaan Eng. Yariisow una istaagaan ka dhabeynta dhaartii ay mareen xilalkana ka xayuubiyaan Agaasimayaasha guud iyo agaasimayaasha waaxyaha ee ku daxaleystay xilka ayaan u qalmin oo ay musuq maasuq iyo ku takri fal awoodeed kusii dareen, waxaana gaba gabadii leeyahay wasiirka warfaafinta Eng. Yariisow waa geesi albaabka u furay in la xaaqo agaasimayaasha guud iyo agaasimayaasha waaxyaha ee ku daxaleystay wasaaradaha bur burka iyo dib u dhacana sababta u noqday.

Qalinkii Qoraa Sare.
Muse Mohamed Osman
muusekiimiko@gmail.com